يـعـيـــن الله يادنـيــــا تســــوق ايـامـــها الاحـــــزان

يعيــن الله وانتي مثـل قــفــلٍ ضـــاع مفــتـاحه

يـعـيـــن الله وجــروحـي لها في كل وقــــتٍ شــان

كـذوب اللي يقـول ان الزمــن بيـداوي جراحــه! 

سقى الله يوم انا يـمــّه غــريــرٍ يـزعــــج الجــيــران

سقى الله يوم انا طفــلٍ يصـــجّ البيت بصياحـه

سقى الله يوم كان اقـصى طـمـوحي لعبــة الدنان

نهاية يومي المغـــرب واخـاف الليـل واشباحـه

سقى الله يوم انا البس بشـت ابوي وثوبه القيطان

واقـلد كل شيٍ فيه حكيَه .. جـِـدّه . . امزاحه

واشيل المسبحه مثله ليا هـوجس وهو ســرحان

يشعر واحسب إن اللي عطاه الشعر مسباحه

سـقى الله بيتنا ذاك البسيــط مشــقـق الجــدران

شجاعٍ . . يهـــزم الغـــدرى بقنـديلــه ومصباحه

تكحلنا القناعه . . لاطمــع . . لاهــمّ . . لاحــرمـان

واذا جا الليــل تكفيــنا ثـلاث اخــــوان طــراحـه

جميــع الذكريات اللي غـدت في قـفـرة النسيــان 

تحاكي حلــوها عــبـره بمــوق العــين سباحه 

خذتني غـــربــةٍ . . عـنــوانـها ( غــربـه بلاعنــوان )

ابي عقب التعب راحه لقى فيني التعب راحه

ورجعت اليوم مثل اللي رجع عقب القنص خسران

غــدى طيــره وجا يسحـب سلوقـيه وملواحـه 

قصيده . . ما بعد مـــرّت في بال مساعــد وضيدان 

هواجيــس ابدويٍ هايــمٍ فـي عــشق فلاحـه

وروحٍ تــايـبــه . . كانــت تبـي لذنــوبـها غـــفـــــران

خطاي اني كتــمـت اســـرارها بعـيــون بواحه

تقــولين المطـــر يمّــــه مهو دايــم يـجــي هــتــان

اجل معذور قلبٍ في همومــه ضاعـت افراحـه

انا يـمّـــه غــلــطــت ولاني اول واحــدن غـــلــطان

ابونـا آدم من الجنــه . . خـرج باسـباب تفـاحـه