ايـه يافـرعـــونة ( الهرج الرهيف )وتـاج راســه

سـيدة هـ اللي يسمـونه قصـيد وسـت بيـتـه

لو دريتي وش جبر شاعرك يبلــع موس ياسه

جرحـه اللي يذكــره .. ويقول للعالم : نسيته

في زمانٍ صـار فيه الشـعـر (تطبيـل) ووناسـه

لايعاني اللي اقــول .. ولا يقــول اللي عنـيته

والله ان البــــرد عــزه لاحـرق الحطــاب فاسه

اسمـعي علمي .. وانا لا قلت علـمٍ ما ثنـيته

كان ياما كان . . والرجال مـلبوســه قـيـاســه

لين صـرت افصّّّـل اطـرافي على ثـوبٍ شريتـه

كلما قلنا (اواه) من الوجع . . قالوا : سياسه!

واكمـلــوا عنّي كـلامٍ .. والله اني ما بـديـتـه !!

واشهد اني مغــرم بهذا الوطن .. واحب ناسه

قل : وطـنك وكل عــرقٍ بي يلبي لك: فديته

من بحــر فيـروزه لخضــرة نخلـه .. الى يباسه

لو حقيــبة غــربتي تاسـع تضاريســه خذيتــه

بس انا رجل الوجع يلبسه من راسه لساسه

كل مكسر ضلع في صدري على كسر طويته

انكسارات العمل .. والركض .. وايام الدراسـه

المسافــه بين ماكنت اطمحـه واللي غديتــه

قلت مرّه يا(علي) من (شلّ)راسه طاح راسه

رد صـــوتٍ داخلي : والله يطيـــح اذا حنـيـتـه!!